【樂壇燈神】又開「金口」讚後輩 譚詠麟𤓓爆認錯衛詩做衛蘭

本月23日便「登七」的譚詠麟（阿倫）一向鍾意提攜後輩，惜出名係「樂壇燈神」的他幾乎捧乜都「出事」！而擁有呢股「神力」的阿倫卻一於少理，繼續「開金口」讚吓啲年青歌手，昨晚就輪到衛蘭（Janice）獲他開Po「點燈」，阿倫於微博留言：「衞蘭新歌：《分手的第二天》旋律好輕快清新易上口！」今次Janice會否被「燈」中就未知，不過阿倫自己就𤓓咗先，事關他貼出的3張電視截圖，其實係Janice的妹妹衛詩（Jill），再者他連人家個姓氏「衛」都寫錯做「衞」！一眾網民睇見都忍唔住留言：「譚校長，這個是衛詩，衛蘭的妹妹，您認錯人啦」、「這就尷尬了」，今朝終於發現認錯人的阿倫即回覆：「哦原來弄錯了，不過首歌確實不錯。」

雖然上月底忽然刪去Facebook和Instagram帳戶，但阿倫依然活躍於微博中，剛才仲連發4個Po，「今天天氣不穩在考慮跑戶外或室內」、「原來戴口罩跑戶外碰上間竭性的大驟雨會令我差一點嗆到，所以跑到一半還是揀跑回室內」、「換件衣服再跑爽多了」，連跑個步都要瘋狂Share，睇嚟唔使開工的他真係好悶、好寂寞。