【唔講政治】想跟歌迷修補關係 譚詠麟強調香港需要法治

今年是寶麗金50週年，今日就以網上發佈形式舉行《寶麗金50週年半世紀的新世紀記者會》，因疫情關係，只有譚詠麟、鍾鎮濤及湯寶如現身，其餘的雷安娜及露雲娜就以視像會議形式參加，加上來自世界各地的傳媒在網上發問。

記者會上播放寶麗金50誌慶串燒舞曲《Stars on PolyGram 50》MV片段，並公布情歌的組曲 ，《寶麗金50 : 半世紀之歌》，兩首歌將會收錄在8，9月推出的 Polygram 50 紀念彩膠唱片《PolyGram 50 GOLDEN Hits》內，而且將於11月舉行Polygram 50音樂會。

談到在寶麗金多年的難忘事，譚詠麟表示當年寶麗金Studio外的椅子最出名，當疲倦時好多人用來休息，還會被鬼壓，但愈壓會愈紅，自己也試過。而阿B笑言好多歌手會到嘉利大廈錄音室錄歌，錄音室有幅牆用石頭砌出來，歌手唱不到就撼頭埋牆。譚詠麟笑指陳百祥撼得最多。他又指嘉利大廈火警當日都在現場，更救了不少人。他說：「我諗返都救了寶麗金Studio兩層樓的人，當時阿叻唱唔到，我話不如聽日先錄，走時先睇到啲煙升上來，他們才疏散。」

問到譚詠麟因撐警跟歌迷政見不同，可會擔心影響寶麗金推出唱片的銷量。他說：「我們尊重每一位朋友，他們有他們的決定、睇法及觀點，有些人不尊重返我們。」再問會否想在音樂會跟歌迷修補關係。譚詠麟說：「我們當然希望他們是我們歌迷，但唔可以話我哋想點就點，呢樣最好唔好拉上政治，但香港係需要法治。」再談到早前跟警務處處長鄧炳強一起參與飯局，他解釋每星期踢波後均會吃飯，當日對方特登前來答謝他們。

此外，提到關淑怡在社交網站發文指退出娛樂圈，問到可會邀請她參與音樂會？譚詠麟說：「如果她心態肯來最好，她是不可多得的歌手，不過可能有些心結、諗唔通。（成日跟她傾？）以前久不久。（近期有否開解未？）叫志偉啦！要做要幫已做晒，佢自己心裹面的想法，要佢自己想通。」