【獨家】按摩店因疫情蝕六位數　鄧洢玲轉做Youtuber教性知識

前ViuTV藝人鄧洢玲（阿旦）跟友人於銅鑼灣合資開設按摩店，開業3年來生意都不錯，但自3月尾因疫情影響而休業，至今蝕足6位數，因為零進帳所以只好每月倒貼5位數交舖租、水電費及畀人工，如今再爆第三波疫情，按摩店要重新關閉至本月28日，她坦言：「𠵱家只係捱緊，希望疫情盡快受控，大家生活回復正常。」由於幕前工作也大受打擊，本身有經營社交平台的阿旦，亦決定努力打好Youtuber呢份工，實行轉戰網上掘金，她更打算拍片分享性知識及做「狗奴」的心得！採訪：黎寶倫　場地：Blossom - The Secret Garden

鄧洢玲離開ViuTV兩年多，一直專注打理按摩店生意，也多了機會拍電影、劇集及監製網上旅遊節目，「走岀嚟世界好大，要自力更生就會努力Push自己，呢兩年學到好多嘢，亦接觸多咗唔同類型嘅工作。」離開靠山後，去年底又遇上新冠肺炎，按摩店生意及演藝工作一律驟降，她坦言上半年幕前Job比全盛時期少6、7成，問可有為撲水煩惱？阿旦說：「我比較樂觀，亦唔係使好多錢，反而係concern點keep按摩店生意，因為係我嘅心血，唯有平時慳啲囉。」但謂至今仍未收到政府資助的款項。

鍾意幫人解決問題
說到積極做Youtuber搵銀，阿旦表示會拍片分享養狗心得及教煲湯，問曾主持兩性節目《啪啪聲，太好聽》的她會否大談「性經」？她說：「之前都有定期開Live同網友傾愛情問題，都幾多人inbox分享自己嘅問題。（有人問Sex？）女仔有，男仔就係口痕友，但我都唔會理。（你都解答到？）基本上都解答到，同埋網上都多資訊。其實都可以諗吓，不論畀愛情、性、生活上嘅Tips我都OK。」