【獨家】一家四口茶餐廳食Tea 張頴康好服侍逐個餵

05年港姐麥雅緻（Angie）去年跟TVB約滿離巢，有一女一仔嘅佢轉做親子KOL。因為之前39歲生日，Angie罕有在社交網貼出性感泳衣照，生過又就嚟4字頭，保養得非常唔錯。日前佢同老公張頴康及一對仔女去茶餐廳食Tea，叫咗兩set菠蘿油餐，一早知張生係廿四孝老公同老竇，但無諗過誇到咁，點誇?佢拎住個包逐個餵，餵完仔再餵女然後到老婆，蔚為奇觀。採訪:譚壹致

究竟咩係親子KOL?即係喺社交平台Sell吓啲兒童用或媽媽用嘅產品呀，日用品呀，食物呀之類，簡單講即係用自己個平台嚟賣廣告，Angie個ig follower有三萬人，對一個前藝人嚟講，唔算太多，要努力吸客嘞。

輪住咬菠蘿油
當日，張頴康一家四口喺沙田一間茶餐廳食tea，一家四口食足個半鐘，其間食咗兩Set下午茶，兩Set都係菠蘿油餐。老婆眼中嘅好老竇照顧好周到，同個仔玩又同個仔影相，有嘢食就將個包遞畀個仔咬一啖，然後再遞畀個女咬一啖，咁老婆當然都有份，最後輪到自己，人人有份咬真開心，不過咁樣交叉食口水尾會唔會唔係好衛生呢?