出海失足受傷太太代報近況　林奕匡趁機放閃：有最好的妻子

早前林奕匡自爆跟朋友出海落船時，失足釀成意外，搞到手腳受傷，更要留院醫治，雖然佢已經出咗院，但係仲要繼續接受治療。呢日佢太太李靄璣就Post林奕匡新相，雖然見佢右手同雙腳都仲包紥住，但精神尚算唔錯，太太仲讚他是見過最極積嘅傷者，「The most positive and proactive injured person I know（我認識的最積極主動的受傷人員）」

太太仲有代林奕匡報告康復情況，令大家安心，「佢複（覆）診後做了物理治療，醫生話佢戴個immobilizer多幾日，就可以唔戴啦！話說呢幾個禮拜，佢每晚都痛到唔係好瞓到覺，瞓三四個鐘就會痛醒，因為止痛藥既藥效都只係得幾個鐘，好折騰，而且一路郁唔到隻手，會連帶頸部、背部、胸口都會酸痛，真係慘慘豬。頭嗰幾日，我已經鍛鍊到變為一個非常稱職的看護，洗頭抹身、清洗傷口完全難唔到我最緊要係冷靜，有耐性，細心啲諗吓假若換轉頭係自己，會想別人點樣幫助你?雖然老公好自責也內疚，但係話過會互相照顧對方一生一世，並唔係信口開河，幾個禮拜又算什麼呢，況且佢絕對係我見過最積極嘅受傷者叫做好翻（返）幾日，已經嚷著什麼都儘（盡）量自己做翻（返），仲無啦啦走去吸塵，真係俾佢激死。最近更日日唱歌，仲竟然彈倒（到）小小鋼琴，所以大家唔好擔心，多謝大家嘅問候。而家疫情加劇了，大家都要好好保重」而林奕匡亦好識做趁機放閃，順便答謝近日辛勞嘅太太話：「I definitely have the best wife（已驗證我絕對有最好的妻子）」