上海拍《射鵰英雄傳》 杜德偉每日報告隔離情況

7月1日，杜德偉(Alex)要飛去上海開工拍攝《射鵰英雄傳之九陰白骨爪》，拍之前當然要隔離，出發前，Alex都好緊張，因為佢話停工太耐所以有工開都有啲心慌，同埋成世人第一次要隔離，最重要就係要暫別3歲囝囝AJ，未上機已經話好掛住肥仔。

一到埗已經要辦隔離手續，每日向有關部門報告體溫，探熱針是必須的。因為Alex租住服務式住宅，有廚房可以自己煮嘢食，見佢手勢都唔太差，簡單一餐難佢唔到，去到隔離第四日，佢都係Hea住過，睇吓卡通片敷吓面膜又一日，但去到第六日，佢終於有嘢做，就係同劇組演員圍讀劇本，當然唔係面對面而係網上圍讀，Alex話終於Feel到進入工作狀態嘅感覺，見佢好認真咁讀劇本，成枱面都係文具，方便佢Mark低重點，再望真啲，Alex原來飾演歐陽鋒，都幾得意。