【港姐面試】23歲廖慧儀獲封「翻版伍樂怡」　鬼妹仔周美善搭錯線多謝網民

《2020香港小姐競選》今晚破天荒以視像會議形式進行面試，並於社交平台直播，讓網民一齊參與「問答環節」。第二組參賽者均任職空姐，分別是25歲的周美善（Michelle）和23歲的廖慧儀（Jessica）。身處挪威接受Interview的Michelle，一開機便將鏡頭打側兼冇聲音，在主持陸浩明（6號）提醒下，她先識得調整鏡頭及聲音，不過20秒的自我介紹中，只提到自己的姓名、年齡及喺挪威出生長大，最後幾秒又再次「失聲」。到評判提問時，被問到啲廣東話點學番嚟？把聲鬼鬼哋似足岑麗香的Michelle笑道：「問得好！我係睇劇學番嚟，同埋細細個爹哋媽咪都有同我講，所以我Pickup到。」

受疫情影響，現實一個月飛一次的Jessica，表示平時不用開工便會教瑜珈、接Modeling Job，被問到可以做秘撈？她即兜：「其實係幫朋友手，純粹係玩吓性質囉。」對於獲網民讚是「翻版伍樂怡」，同場的Michelle即「搭錯線」搶先回應：「首先多謝晒呢啲Comment係男女都鍾意聽，Thank you。」場面尷尬。