【港姐面試】高學歷候選佳麗勁P圖　港大碩士郭栢妍獲網民讚正

《2020香港小姐競選》今晚9點正式開始面試，大會更破天荒透過網上直播形式進行面試，除了評判現場發問外，網民也可即時留言向參選佳麗提問。席間，50位候選佳麗分為不同主題的組別，即場進行視像Interview，主持陸浩明（6號）以「高學歷」來形容第一組參賽者，包括在倫敦皇家音樂學校修讀音樂碩士的23歲翁慧嫻、剛於英國完成法律系碩士課程的賴彥妤、正在香港大學修讀歷史系博士的陳美濤，以及同樣在港大修讀市場及管理學碩士的郭栢妍。

在面試開始前，螢幕先登出4位參賽者的靚相，無奈「真身」一現，原來個個都係「照騙」！首先出場的是翁慧嫻，相中的她面尖尖、白雪雪，殊不知「真人」膚色偏黑、手臂脹卜卜，鼻影仲落得勁重手，儼如趙薇於《少林足球》飾演的「阿梅」一樣，她說：「希望參加港姐嚟正值自己、挑戰自己。」

做過6年模特兒的2019年英國華裔小姐冠軍賴彥妤，比起相中一副「網紅樣」，現實的她卻沒有V煞面，連網民都忍唔住叫她：「真人靚過相，下次唔好P圖P得咁勁！」賴彥妤表示：「而家啲女仔就算影得靚唔靚都好，都習慣執執啲色同微調一下，令Po出張相再自信啲，我都會接納呢位網民（意見），首先多謝你咁讚我，下次可能用自然風啲嘅相，睇吓大家鍾唔鍾意嘞。（即係次次都P圖？）大致上都會，可能執吓色同微調。」

而最受歡迎的郭栢妍就醒目加Filter，令畫面顯得更Soft，對於獲網民讚正，她說：「多謝先，但我覺得其他3位都有唔同嘅靚，大家慢慢發掘吓。」至於陳美濤就冇咁「美圖」，同張相一樣牙大大，十足「大牙版麥明詩」。