【頭條獨家】大讚曾樂彤第一次填詞好掂洪嘉豪戴口罩戴到冇晒心機

2020-06-11 18:00

華納歌手洪嘉豪(Kaho)最近推出的新歌《自問自答》由曾樂彤處女填詞，主題講每個人於唔同階段，面對愛情、人生及性格上嘅內心掙扎，他大讚曾樂彤做到嘢，歌詞完全表達到他想講嘅意思，好掂！採訪：方騫平

洪嘉豪跟曾樂彤屬同期出道嘅新人，Kaho透露「大家傾偈時，佢對歌詞有研究，對文字又好敏感，會同我分享佢填嘅歌詞，所以靈機一觸，邀請佢幫我demo寫吓詞，當係一齊練習，其實佢寫咗幾首，呢首係其中一首，覺得好啱就促成咗今次嘅合作。」

好想快啲除罩
新歌《自問自答》構思來自洪嘉豪的某一夜情感，當晚佢有啲唔開心，寫歌畫面係一個人瑟縮角落，思想上同自己搏鬥：「曾樂彤就將我呢個畫面用嚟發揮，雖然交嚟嘅歌詞都有少少修改，但都好OK，我同佢都老友，佢唔會嫌我煩，反而對第一份填詞作品好緊張，仲緊過自己出歌，因為佢想喺呢方面發展，我要安慰佢放鬆啲！」問到對方將第一次填詞交畀佢，佢笑言只係寫詞啫，「咁啱我搶先一步出歌，多謝晒呢個朋友。」不過，他卻沒有八卦曾樂彤跟游學修嘅感情事，他笑說：「就算佢單身，我都唔會追求佢，因為兩人如同兄弟相處。」

雖然疫情緩和，但呢個時候出歌多少有些影響：「希望疫情快啲完結，疫情下最困擾反而係戴口罩，因為日日戴住令人好冇心機，成個城市死氣沉沉，希望大家除低口罩可以笑面迎人，尤其天氣愈嚟愈熱，好辛苦。」