【頭條獨家】無視老婆眼中只得囡囡　林子善帶女打針高度戒備

去年底榮升老竇的林子善好錫個女，即使近日忙為新劇《超能使者》開工，但一唔使開工便飛返屋企湊女。由於疫情持續不散，子善夫婦都甚少帶5個多月大的女兒「小乖乖」林以晴出街，以減低受感染風險，惟初生嬰兒需定期注射疫苗，日前一家三口都避無可避，高度戒備帶囡囡到尖沙咀診所打針。採訪：李維隆、黎寶倫

林子善早前託朋友幫小乖乖買BB口罩，惜對方卻買錯大碼Size，搞到他都忍不住出Po揶揄：「尺寸啱啱好仲遮埋隻眼，安全指數達100。」未料看罷B女的「全面戴罩」照，有網民就留言擔心BB會焗親，事後子善澄清影完相已即脫罩，仲表示比任何人更緊張囡囡，絕不會攞對方條命較飛！其實呢位「新手爸B」都做足功課，日前跟太太董佩欣（Kary）帶愛女去尖沙咀打針時，夫婦倆也遵從專家意見，特意為BB車套上透明防風罩，阻隔細菌。

新手老竇撩女講嘢
當日下午2時許，一家三口沿廣東道步行至海洋中心，再乘電梯上13樓診所，其間子善一路推住BB車一路同小乖乖傾偈。甫進診所，兩公婆即自動波消毒雙手，待B女進房打針前，他又抱住小乖乖到附近較少人的梳化坐低，太太就坐在旁邊低頭填Form，而子善眼中只有囡囡，兩父女還不時深情互望，十分有愛！見對方欲啜手指，他即出手制止並拎出奶嘴給BB食，之後又不斷撩囡囡講嘢，正牙牙學語的小乖乖亦發出「吖吖」聲回應爸爸，非常可愛！逗留約1小時，為免在街外感染病毒，在BB完成疫苗注射後，一家三口便迅速回停車場取車返歸。