【頭條獨家】主持育兒節目乘機偷師　黃澤鋒望囡囡快樂成長

53歲黃澤鋒與太太陳麗麗去年老來得女，自然將萌B「小黃妃」黃𤋮恩寵到上天，近日為香港開電視育兒節目《我的志願速成班》任主持的他，亦乘機向一眾專業人士偷師。問是否望女成龍？他只希望囡囡快樂成長，又慨嘆：「自從多咗個小朋友感覺唔同咗，而家想老啲先死，想睇到佢最少大學畢業，如果睇到個孫岀世仲好，但唔知自己有冇咁長命。」採訪：黎寶倫　場地：The AIR (The ONE)

此次《我》節目中，邀得不同成功人士分享育兒之道，去年7月才榮升老竇的黃澤鋒認為：「小朋友將來做乜，係要用唔同方法培育，但最重要係佢哋有興趣。」難道不渴望女兒繼承衣缽做女飛魚嗎？曾是香港游泳代表隊成員的他私心說：「想！我都希望自己攞獎嘅項目，個女都可以攞到，咁就老懷安慰。」但謂人生苦短，不會強迫囡囡做任何事去破壞兩父女的感情，澤鋒感性地說：「坦白講我90歲時，佢先30幾歲，所以盡量令佢快樂人生。我同太太都唔想成為佢負擔，所以呢十年八年會快快搵多啲，Set一個好家庭、好位置畀佢行，唯一要求係要佢好好讀書。」

做人唔好悲觀
提到受疫情影響，年初四起主要收入來源遭截斷，澤鋒卻表示絕不悲觀，「我成日同自己講聽日一定會好，最多重頭嚟過，留得青山在哪怕冇柴燒，樂觀其成囉。」面對社會一片愁雲慘霧，他稱將來都會教囡囡要逆境自強，「人生係一個過程，要為理想而戰鬥到最後一刻！唔好因為而家嘅環境將你人生改變，Set咗咁行就要堅持，過程崎嶇咪用意志走過去囉！」