【維港會】買叉燒包無叉燒中伏 網民搞笑抽水：個包消化咗

雖然老婆餅無老婆，菠蘿包無菠蘿，不過叉燒包無叉燒就實在令人哭笑不得。有網民就在荃灣梨木樹街市一個賣蒸包的鋪頭，買到一個無叉燒的叉燒包，比起包更似是饅頭，令他嬲爆。

網民在Facebook分享圖片，「買個叉燒包，咬落去仲以為係饅頭嚟，果然係奸商」。只見叉燒包咬開，白雪雪中一點紅，完全不見叉燒影，只有正中間一滴叉燒汁，十足十與饅頭無異。

網民看完都瘋狂抽水，留言令人笑爆，「個包消化咗粒叉燒」、「處女包，俾你咬到見紅」、「咦你留牙血係個包度喎」、「人血饅頭」、「嚿叉燒生咗出嚟啦，依家個包坐緊月」、「樓主就係果嚿大叉燒」，有人就說可能看漏了個「汁」字，其實是「叉燒汁包」。亦有網民分享朋友在餐廳食到叉燒湯意，同樣叉燒少得可憐，更有人搞笑和奶黃包上一點黃作對比。