【繼續娛賓】扮嘢玩食字爛GAG浪接浪　阮兆祥搞到網民笑到噴飯

熱愛搞笑的阮兆祥（祥仔），疫情期間依然絞盡腦汁為港人發放正能量，早前扮演的「抗翼大師」李雞鳴及「髮力無邊」的渡邊直不美成功為網民帶來不少歡樂。出名勤力的祥仔，近日搞笑作品更是浪接浪，昨晚推出「盧EYESEE‧一D都唔好笑」系列，大玩平日私下最擅長的食字爛GAG；其中一個GAG更以早前的撲口罩熱為主題，笑指「花草樹菜」四樣東西，以菜的撲口罩能力最高，到底點解？答案還是留待大家上網睇片自行揭曉。對於祥仔大玩爛GAG，網民似乎亦相當受落並留言：「笑到噴飯」、「我想幫你剪頭髮呀。」更有網民感激祥仔如此有心：「祥仔好nice，多謝你帶比（畀）香港人快樂。」

問到祥仔為何近日落足火力「娛賓」，他笑言：「冇呀，啲人成日話個人開心啲，病痛都少啲。咁我平時都好鍾意講爛GAG𠱁人開心嘅，我又知大家呢排好少出街上網多，所以就決定拍多啲搞笑片放上網，希望分享多啲正能量畀大家，一齊以笑聲抗疫。」祥仔又謂十分感激創作團隊過去數個月來為他絞盡腦汁度造型，「呢排真係過足扮嘢癮，最開心係啲造型大家都好受落。其實嚟緊我都希望可以再拍多啲搞笑嘅扮嘢片，如果大家仲有咩想我扮嘅，都好歡迎去我個YOUTUBECHANNEL度留言，我會盡力滿足大家嘅要求嘅。」