【頭條獨家】拍親熱戲唔備案講信任　黃智雯獲姊妹封戀愛達人

無綫劇《十八年後的終極告白》進入結局篇，殺人真相陸續揭曉，劇中，母親被男友譚俊彥誤殺的黃智雯直言一度拍到崩潰爆喊，現實中也試過遭另一半背叛的她說：「原來發現畀人呃係會頭腦一片空白！」雖然前度一腳踏兩船，但並沒有令智雯對愛情失去信心，仲獲閨密封為「戀愛達人」，她認為互相信任好緊要，其現任男友亦然，故跟譚俊彥拍激烈牀戲，她都不會刻意備案。撰文：黎寶倫　攝影：李維隆　服裝：Kate spade　髮型：Jay Cheung @hair　化妝：小白

黃智雯於懸疑劇《十八年後的終極告白》飾演督察，劇情講述她調查一宗骸骨發現案，從而揭開18年前一樁7子集體殺人的真相！由於故事暗黑，智雯直言一度拍到崩潰，仲嚇窒好友何遠東，「以前嘅角色或劇本比較開心，但今次劇種好陰沉，係揭露緊一啲人性嘅真相與醜惡，拍攝時都好抑壓，自己又儲埋好多負能量，有日拍到就嚟爆煲，個頭好痛，喺錄影廠出面見到何遠東，突然間就爆喊，佢從來未見過我咁軟弱，所以嚇親！」幸有閨密趙希洛一同拍攝，她才能抽離角色，「雖然同場唔多，但我每次見到佢都好似開籠雀咁，𢱑住個水泡傾偈、排毒。」

成閨密學習對象
說到現實中經歷人性醜惡的事件，自認易信人又蠢的智雯不諱言曾被初戀男友劈腿，令她刻骨銘心，問會否從此頻頻Check另一半？跟圈外男友詹文天拍拖6年的她稱：「冇，互相信任、尊重好重要，某程度上我都要畀安全感對方，令大家有互相信任嘅默契，所以我唔會猜疑，呢啲心理遊戲好辛苦。」胡說八道姊妹應該會獻計吧？智雯即沾沾自喜說：「冇，佢哋成日讚我喺呢方面好有智慧，話要向我學習。有時諗嘢愈複雜愈鑽牛角尖，反而簡單啲，唔好咁執著將問題化大，件事可能唔係你想像中咁大件事。」