母親節開live獻sing 張兆輝獲讚係樂壇新人王

張兆輝係圈中好爸爸、好老公及好兒子，藉着昨日母親節，昨晚他喺一間餐廳內開live《獻sing》，送給89歲年老母親嘅母親節禮物，開live接近1小時，facebook吸引2萬多人次瀏覽，香港、星馬、美加、澳洲、越南等fans都大派心心。今次演出，輝哥好認真同用心㗎，仲搵埋Ben老師現場伴奏。

輝哥說：「今次主角係阿媽，有呢個構思，係因為兩年前大仔18歲生日，喺現場唱過《念親恩》，當時媽媽聽到手舞足蹈，好開心，既然媽媽乜都有，不如現場送呢首歌佢聽，表揚做母親偉大，係份心意嚟啫。」除咗演繹《念親恩》畀媽咪外，輝哥又揀咗唱許冠傑的《父母恩》、《月亮代表的的心》、《一生中最愛》，甚至大唱閩南歌《愛拼才會贏》等。期間有fans即席點唱《偏偏喜歡你》來考驗他，輝哥成功過關，更被大讚唔單止演戲好，唱歌都有水準，有人留言聽到缺氧、讚他係2020年新人王、可以出唱片、可以唱吓劇集主題曲...輝哥笑說：「咁大家補頒個獎畀我。」因為反應相當熱烈，有人要求他今年父親節再開live唱過，輝哥笑說：「咁要人哋唱返畀我聽喎！」

另外，唔少fans話輝哥very handsome，同郭富城一樣咁fit，輝哥笑說：「ok嘅，係件衫窄啫！係時候要保持體能喇！因為5月底會接拍電視劇《飛虎3》，到時應該會好熱，所以型要付出代價嘅！」