狂健身操出兩嚿腹肌　洪永城辛苦到想跳落海

由於新冠肺炎疫情關係，早排政府下令全港健身室關閉，不少人選擇轉到戶外做Gym，好似最近拍緊新劇《陀槍師姐2020》的洪永城（Tony），為了不輸同劇的「大波謙」羅仲謙和健美先生關曜儁（前名關梓陽），上周就自爆約朋友去公園做運動。曾被好友黃翠如笑肚腩大的Tony都好勤力，昨晚再於Instagrama（Ig）上載健身影片「交功課」，並留言：「搵到好地方outdoor workout、好陽光、討論咗啲新嘅方向，繼續奮鬥。#之後再去跑咗45分鐘步 #為夏天進發 #為下個月進發 #為明天進發」

片中，他在海旁做完Push up、TRX懸吊訓練及來回跑後，即索晒氣扶住欄杆苦叫：「我要跳落去（海裏）喇！」事後，有網民留言問有腹肌未？Tony透露：「有，兩嚿。」不少人都表示期待他爆即的一日，仲有人叫他除衫𠻹！不過Tony卻搞笑回覆：「我好唔心急。」各位絲打慢慢等下啦。