【食完先減】預祝母親節 余香凝三代同堂打邊爐

因為母親節正日要開工，所以余香凝尋晚提早同媽媽及婆婆慶祝母親節，加埋妹妹余潔瀅去打邊爐慶祝，疫情緩和，多日無本地確診，打邊爐唔怕啦。

余香凝表示，「預祝母親大人同婆婆 母親節快樂！❤️❤️世界上最偉大嘅女人，希望妳地每一日都開心快樂，身體健康！好耐無打邊爐，好滿足，好好食🤤」

尋日佢先自爆疫情下順道調理身體而肥咗十磅，戒飯多年嘅佢亦聽從中醫建議，日日食飯，不過佢下周要同鄭中基演ViuTV新劇《暖男爸爸》，因為唔想企喺對方隔離顯得「太大份」，佢話會用極端方法減肥，咁食埋呢餐先減囉。