【專欄】疫情政治化 SOHO先中槍

美國總統特朗普話要徵收關稅，以報復中國瞞報疫情，美國國土安全局提供材料話，中國無即時通知美國新冠肺炎疫情，以便囤積醫療用品牟利。喺中美貿易糾紛重臨下，港股五月首個交易日低開，全日反彈乏力，收市勁插1029點。

特朗普將美國疫情大爆發責任歸咎於中國，聲言要加徵關稅，此說法一出，在財金界惡評如潮。美國經濟現在已經半殘，總統仲話要同全球第二大經濟體打關稅戰，效果必然係雪上加霜。早前特朗普遷怒於世衛，即時停止提供資金，歐洲等盟友無人認同，中國仲唱反調，即時加碼泵水。現在特朗普話中國瞞疫，要求中國賠償，對北京來說，這個做法涉及國家尊嚴，根本不可能接受，雙方肯定會硬碰，財金人士個個求財不為求氣，見到總統咁玩法，當然係柴台多過支持啦。

要等特朗普砸自己隻腳

特朗普要中國硬食爆疫責任，成功機會有幾大，相信心中有數。上任以來，他以「口術治國」本色日益明顯，特別喺新冠肺炎抗疫中表露無遺。現在他指控中國，好大機會係轉移視線，方便自己拖時間。正如他上個星期拿金正恩出來做文章，咁又捱咗兩日見記者的話題。美國喺經濟惡化下再打貿易戰，無疑係拿石頭砸自己隻腳，當隻腳砸到痛，他又可以面不改容轉軚。

　　從呢個角度睇，如果美股因為特朗普言論大跌，反而對港股係好事。正如去年貿易談判，美股迭創新高，特朗普就口硬玩花招，美股一跌，他態度話咁快回歸理性。

喺中美關係趨向緊張下，SOHO中國（410）因為傳出美國黑石基金洽商私有公司方案告吹，股價喺午後急插，收挫25%，見2.75元全日低位。3月初傳出SOHO中國正與黑石集團就潛在私有化進行談判，每股私有化作價或達6元。SOHO中國於3月11日收市後發通告確認，正與海外金融投資者洽談，以探討進行戰略合作可能性，可能導致也可能不會導致對公司股份作出全面要約。中環茶友早前都入咗少少呢隻股票，消息公佈後只係食咗小小胡。

茶友手頭仲有貨，自然較留意股價走勢。他說有關消息一直由外媒主導，今次先係內媒爆料。上次外媒報道話黑石出價6元私有化，但跟住無下文，股價就喺4元左右徘徊，看來有點異樣，但因為4元價格同傳聞私有化價錢有頗大距離，所以他只是沽了部份股票，鎖定一點利潤。

黑石若想以6元私有化，不排除係買入拆骨。由於私有化作價同資產淨值有一段距離，這樣過手都會有錢賺。這類大交易事前應該會做足風險評估，吹得風理應不會隨便取消，新冠肺炎雖然打擊好大，但始終有過去之時。然而現在疫情變成政治事件，加上中美關係走向惡化，做大交易躺着也可能中槍，傳出交易有阻滯就不足為奇。SOHO中國大股東短期內要大舉套現似乎不太現實，茶友做定準備要長守一段日子。

股神清倉 航空股受壓

藍籌股全軍覆沒，騰訊（700）、滙控（005）、建行（939）齊跌4%；友邦（1299）失守70元關，挫5.6%，收報67.9元；以上四股質低大市421點。中銀香港（2388）則走低2%，收報23.35元，已是表現最佳藍籌股；中信股份（267）瀉9.42%，收報7.31元，為最弱勢藍籌股。

中美打交不利經濟，能源需求衰上加衰，三桶油跌幅居前，中石油（857）瀉9.3%，遠差過大市，收報2.55元，低見2.51元，為表現最差藍籌股，公司首季轉蝕人民幣162億元，而且預告上半年盈利大跌；中石化（386）挫8.7%，報3.59元，跌幅居第二位；中海油（883）跌7%，報8.16元。

「股神」巴菲特透露，由於疫情嚴重重創旅遊業，旗下投資旗艦巴郡已「蝕本」清倉所有航空股，完全退出美國最大四間航空公司投資，拖累本港上市的航空股亦走低。南航（1055）挫6.2%，收報3.63元；國航（753）急降5.9%，收報5.24元；國泰（293）跌1.4%，收報9.06元。中銀航空租賃（2588）委任Paul Kent為首席商務官（歐洲、美洲及非洲地區），股價無情情挫8.7%，報47.9元。(陸羽仁)

原文刊於《頭條日報》「金融High Tea」