【抽離唔到角色】Flow寸謝東閔「綠帽俠」　王喜揶揄朱智賢演技冇進步

朱智賢（Ashley）驚爆背男友謝東閔偷食人夫黎振燁（Jackson），有傳Jackson更為「小三」拋棄大肚妻！事件曝光兩日後，殘暴的Ashley昨日便於謝東閔的陪同下，現身將軍澳電視城開道歉記者會，隨後再接受《東張西望》獨家訪問，Ashley聲淚俱下自認演戲經驗少，故自覺「抽離唔到個色」而犯錯，並向《食腦喪B》監製及一眾演員致歉，希望大家能給予她機會；而日前才被Ashley降呢好友的謝東閔則將責任攬上身，自認經常掛住工作而忽略了女友，並承諾陪伴對方走過這段艱難的日子。無奈一眾網民似乎唔多Buy其「暖男」舉動，不少人留言指：「點解係謝東閔出嚟，而唔係黎振燁」、「唔明搵個緋聞男友出嚟解釋啲咩」、「企出嚟認戴綠帽」、「謝東閔其實都唔係太紅，忙乜鬼」、「佢似畀TVB迫出嚟扮好男人」等。

對此，不時於社交平台發表意見的王喜，今日凌晨都忍不住於Facebook留言寸Ashley：「抽離唔到角色？哈～～～畀你撈到個角色鍾意食屎咁阿伯母咪慳好多米飯？公司咁多過來人前輩做過咁多示範，你都毫無進步，以後點偷食，噢，sorry，點搵食？」至於跟黎振燁同屆港男出身的梁裕恆（Flow Leung）亦於Facebook連環出Po轟3位當事人，他先揶揄Ashley：「抽離唔到角色，好彩佢唔係演殺人犯。」後恨批製造「綠帽俠」此角色去拆局太不智，認為完全違反常理和人性，是過份虛偽的詭辯，並寸「綠帽俠」之稱號，謝東閔實在當之無愧，Flow爆粗說：「畀着我一定會XX個X街冚X剷老婆大住個肚仲去搞我條女，唔會稱呼對方為黎生，冚X剷就冚X剷，唔會出嚟話因為自己太忙小咗時間陪女朋友，所以佢出軌！講到合情合理咁！雖然好多網民寸佢有幾忙？但就算真係忙，兩個人一齊咪傾囉，講出口想多啲見面，而唔係去偷食解決，除非男方都係忙住偷食就冇嘢好講！」

對於Jackson出軌一事，有網民認為應該褫奪其港男冠軍資格，Flow則表示：「真心想佢改番名叫『TVB先生冠軍』，唔好侮辱咗香港人。」有報道指事發後，Jackson已第一時間向下月生B的太太下跪認錯，最終黎太都原諒了老公，而TVB方面原先亦安排二人現身記招，惟黎太昨晨突感肚痛不適而甩底，Flow就鬧爆：「呢刻仲要為咗自己嘅名利叫個老婆出嚟做大龍鳳黎太真係好慘，仲唔夠醜，人哋唔係撈呢行㗎，要做戲自己做啦！條友仔留得喺呢個圈一定有下次，只有零次同無限次！公眾人物有社會責任，冇得賺觀眾錢時就關我哋事，佢哋做錯時就家事唔關觀眾事。」又認為若非因偷食斷正，Jackson早已拋妻棄子離婚，最慘是肚裏的BB，他說：「男人或女人都會情感或慾念失控，好正常！但不要破壞一個有小孩的家庭，更加唔好要一個未出世嘅BB去承受你班大人淫亂嘅罪！做人應該要有這條底線！」