【體貼ARMY】直播畫畫做手作 BTS幫Stay Home Fans解悶

本來要做《MAP OF THE SOUL TOUR》嘅BTS無浪費時間，之前RM開直播已透露正籌備新專輯，同時為怕ARMY (BTS粉絲稱呼)太悶，BTS的Suga、RM及Jhope分別喺「BTS TV」及Vlive開直播表演畫畫同加工ARMY Bomb，數十萬ARMY睇得好開心。

Suga嘅畫畫直播堪稱史上最安靜直播，有ARMY話好彩聽到Suga打乞嚏，否則以為自己部電腦嘅喇叭壞咗，Suga在直播中亦透露開始制作新專輯，而BTS成員亦會各自負責唔同項目，包括音樂、視覺及管理等，他更講到明，因為目前無得表演，所以為了ARMY先會直播自己畫畫，如果唔係有疫情，ARMY係無機會見到佢畫畫。

而究竟點解佢會畫畫？因為Suga媽媽有畫畫，所以就有顏料去畫嘞，佢覺得畫畫好有趣，可以令佢好專注而暫時擺脫一啲混亂嘅想法，另外佢好想問吓識畫畫嘅人點睇佢幅畫，最後佢話自己以後應該會經常畫畫，至於畫作會稍後貼喺Twitter及weverse，同埋佢唔敢相信自己畫咗20分鐘畫。

而隊長RM及Jhope就一齊加工ARMY Bomb，整咗45分鐘，兩人就好自豪，不過Fans就笑佢哋嘅作品好似自己個小學生女兒整嘅勞作一樣質素(笑)，最後，JK加入結束部份，同RM及Jhope一齊講拜拜。