【頭條戲場】《狩獵的時間》睇住老鷹捉雞仔

由李帝勳、安宰弘、崔宇植及朴正民等主演的韓國電影《狩獵的時間》一波三折，因為電影原定2月在韓國上映並獲邀參加第70屆柏林影展「特別放映」單元，當時電影已賣埠予超過30個海外地區，但因受疫情影響而被迫撤檔，最後更安排透過Netflix播映，但之前因為投資發行商同海外銷售商講唔掂數，令上架日期延遲，好彩終於有得睇。電影屬驚慄動作片，片長兩個幾鐘嚇足我兩個鐘，氣氛處理非常出色，一個人睇會不時肉緊地大叫，提咗你。(剛上架)撰文:廖思慧

電影由四個男人一個癲佬一堆美金同一疊閉路電視記錄衍生一場超刺激獵殺行動，因為壓迫力實在太強睇到我要不斷將聲量收細，仲要久不久停機行開吓，因為嗰種殺到埋身嘅感覺真係好恐怖，明白戲名點解叫《狩獵的時間》。

一開始就錯
故事發生喺一個灰暗嘅未來城市中，剛放監的俊錫（李帝勳飾）因為聽到獄中大佬的推介，想搵一筆錢移居台灣墾丁生活，於是召集老友基勳（崔宇植飾）、章浩（安宰弘飾）及常秀（朴正民）從長計議，決定打劫地下賭場，無錯，根本自殺式行為，最後被以殺人為樂的神秘人(朴海秀飾)追殺，一個追四個逃，幾次殺到埋身，槍頭對額頭，睇住待宰獵物不斷逃生，槍戰連場嘭嘭嘭嘭。

憑《上流寄生族》登上奧斯卡國際舞台的崔宇植表示拍畢《狩獵的時間》後才接演《上流寄生族》。他透露「基勳」的戲份很重，亦是所有角色中最後才選定的，所以演出時倍感壓力。而飾演冷血殺手的朴海秀完全顛覆以往形象，乜都唔講殺氣已爆燈，連當事人都話因為太投入角色嘅孤獨及陰暗面而陷入失眠之苦。