親子時間任囡囡舞　張繼聰晒愛女美甲傑作

受疫情影響冇工開，張繼聰（阿聰）最近除了多了時間在家中彈結他、幫太太謝安琪影靚相外，得閒仲會陪3歲細女張靖（Karina）玩，繼早前同囡囡、Elsa公主食茶點後，今日阿聰又上載了一段短片，並留言：「今日茶會之前，要美甲。」片中，阿聰Close up影住自己隻左手，Karina就拎住支「姣婆紫」指甲油，快速地幫爸爸塗勻5隻手指甲，被塗到出晒界的阿聰豎起大拇指，向鏡頭展示囡囡的「佳作」，相信全程冇出聲的他都好無奈！

雖然Karina的美甲技術仲有好大進步空間，但「姨姨」黃翠如卻留言：「我想預約。」而江嘉敏就抵死問阿聰：「要唔要化妝呀？」阿聰即回覆：「平時開工都夠皮。」不少網友都留言讚好笑，有人仲笑話：「我感覺到手指都有感情戲嘅表達……」、「好得喎，呢位美甲師100分」、「太靚，可唔可介紹下喺邊度整㗎」等，阿聰都有回覆大家，笑指「美甲師」Karina好有效率，10秒唔使已經搽晒5隻手指甲，仲話搵緊Reference襯乜衫𠻹。見他好有耐性逐一秒覆，睇嚟「閉關」的日子真係好悶、好得閒！