【維港會】確診留學生被指將醫院當酒店 要求提供WiFi及雜誌

新冠肺炎蔓延全球，不少外國留學生紛紛回港避疫。近日有帖文指，有留學生及持香港身分證的外國人將醫院當作酒店，提出諸多不合理的要求，甚至要脅醫護如不跟進便會投訴。

有網民於昨於「HA Secrets」的facebook專頁內發帖，文章指部分確診的留學生及持香港身分證的外國人經常作出無理要求，不停大呻留在醫院好悶，要求家人帶遊戲機給他打機，又要醫院提供WiFi及指定雜誌以供消遣。

帖文形容該批患者為「大爺」，膳食方面十分「腌尖」，「當正餐廳咁落order，三文魚燒雞先食得落！」有醫護對「大爺」表示無法提供那些食物時，反遭他們投訴剝削病人，令到病患無法得到足夠營養，因此批評他們：「個個肥C大隻，好心有得食就食，唔好食咪食少一餐半餐當減肥囉。究竟佢哋知唔知自己喺度係醫病唔係度假㗎？」

帖文一出成為網路熱話，不少網民批評他們「自私」，如叫家人帶東西入來，「拎一次黎又要浪費多一set PPE（防護裝備）」，而且「拿了私人物品入來，將來又帶番出去，如何保證沒帶病菌？咁樣好容易帶番病菌出社區㗎！唔該佢地唔好咁自私，用腦諗吓喇！」

有人還指出醫院餐一定夠營養，因為「有營養師睇，至於好唔好味因人而異，醫院係提供病人『需要』不是『想要』」。也有人表示：「 I’m not alone，間間醫院isolation ward都係咁，唔洗錢醫仲咁多聲氣。」