【維港會】爆有本土口罩廠中伏 K Kwong：識做就出古惑

疫情下生出口罩荒，有能之士都設法急開生產線製作「Made in Hong Kong」口罩。經過一輪籌備，有人成事，有人原來據化學博士K Kwong（鄺士山）引述在「食緊屎中」。

K Kwong昨日在其社交網站facebook帳戶發文，提到有口罩廠投資者「9成食屎中」，解構原因，原來是「不熟不做，識做就出古惑」，當中提到4大中伏位：

1.有大廠入咗「百鳥歸巢」+「淘寶」機，一起機就唔同步入料，好似個printer冇咗一隻色咁，即係仲有排攪。 2.有人俾人「老點」入咗啲錯嘅「靚料」：50gsm中層MBPP，人哋大部分係25gsm。 3.有人被騙：假Cert、假貨A（非MBPP，只係SBPP）、假貨B（MBPP冇加靜電，吸唔到好多微粒）、假貨C（果卷原料只有面部分係MBPP，個卷芯中間係紙）、假貨D（全卷原料一大部分唔達標，出嚟啲貨有得有唔得，自己都唔知邊批用得）。 4.中間人失蹤：買MBPP貨到咗有一部分係SBPP，收完貨，錢都俾晒，人又失蹤。

K Kwong還在回應網友留言時解釋，50gsm中層MBPP雖屬「靚料」，但戴起來太焗。看畢貼文，有網友好閉翳，「擔心明知出事，繼續當冇事照賣」。