【頭條獨家】自問行得正企得正 鄧佩儀珍惜上位避緋聞
2020-02-26 19:20 
入行6年，27歲嘅鄧佩儀（Gloria）冇乜緋聞，形象入屋又討好，而且肯搏肯捱，深得公司歡心，劇接劇未停過。拍緊嘅重頭劇《踩過界II》雖然唔係女主角，但角色相當出位，劇中飾演熱情大學生，還會主動生擒兼色誘「盲俠」王浩信，好有發揮。被TVB力捧嘅Gloria強調會注重個人言行，力保上位小花位置：「電視台有咁多人，靚同好戲過我多的是，所以真係要珍惜機會呀！」咁識諗，抵捧啦！採訪：方騫平 攝影：李維隆 場地：北京老家@尖沙咀加拿分道
近年鄧佩儀拍嘅劇集真係唔少，繼《金宵大廈》、《鐵探》後，仲有未出街嘅《機場特警》、《降魔的2.0》，而《踩過界II》正在拍攝中，雖然Gloria劇接劇冇乜時間休息，但她堅持想趁年青力壯拍多啲：「其實我都冇理自己係咪上緊位，講真自己都算係幸運嗰批，電視台有咁多人，靚有靚過你，好戲有好戲過你，唯有把握機會盡做。」問到係咪會力保形象避開緋聞？Gloria答得好得體，「呢行係需要適量曝光嘅，但盡量唔好搞到自己一身蟻啦，好彩我對人唔太熱情，而且喺感情上屬冷靜類型，所以唔易令人會錯意，自然少咗緋聞。」
好鍾意唱歌
Gloria又指諗返初入行時真係驚，搞到約異性朋友食飯都唔敢，「𠵱家人愈大，愈想享受生活，做返自己，只要行得正，企得正，正常社交都冇乜所謂。」鄧佩儀除咗拍《踩過界II》喺角色上有突破外，她仲有個小小心願：「原來我啲fans好鍾意聽我唱歌，如果可以唱到有份演嘅劇集歌曲就好喇，就算做一啲歌手嘅角色，可以開到金口都唔錯，我好鍾意唱歌㗎。」
最新回應