完美爆喊因人為錯誤沒了 張兆輝失望無奈

張兆輝、姚子羚、蕭正楠、洪永城等主演的無綫劇集《黃金有罪》，明天（14日）將迎來大結局。繼姚子羚飾演的「水敏晶」被車撞之後，陳瀅同洪永城飾演的「水敏婷」、「莊帶喜」又會被殺手追殺，蕭正楠飾演的「錢永進」因與人大打出手，性命危在旦夕，是否都跟輝哥飾演的「榮木桐」有關？則有待揭曉，但可肯定，輝哥將於今明兩集，演技再度爆發，其中一幕輝哥在子羚被車撞後，收到對方寄給他的文件，令他悲從中來，失去方知自己最愛「水敏晶」，連場爆喊。

對於連場爆喊鏡頭，輝哥直言：「絕對戲味十足，好多時喊戲得自己一個，即將嗰幕講我收到子羚寄給我的文件，跟住我好自責，之後就要喊，拍嘅時候就只係對住一個公文袋。」拍攝當天，輝哥一早已經自己設計好場戲，希望一take過完成，可是當日出現了一些人為錯誤，令之前他覺得完美的那一take沒有了，所以輝哥覺得有些失望同無奈，希望觀眾第二take也收貨吧！除了喊戲之外，輝哥亦有跟子羚演親熱戲，問到兩者哪一類較難演？輝哥直言難度不相伯仲：「其實喊同親熱戲都好需要講感覺，可能因為同子羚都好信任，所以拍攝前不用講太多、一陣個位點就點就，令出來效果好自然。」

至於劇中多個經典場面，最深印象會是哪一個？輝哥想了一想說：「收到信講阿爸已死咗嗰幕！因為原本收到阿爸寄來嘅信係好開心，但原來講佢自殺死咗，由冇情緒去到有情緒一take過。」
曾見證輝哥多場喊戲的姚子羚也大讚對方喊功驚人：「喺泰國拍攝嗰場輝哥喊戲，其實嗰日我好緊張，因為知道輝哥呢場戲好重要，當時剛開拍，同輝哥未太熟絡、未warm up，我在旁邊驚NG會影響咗輝哥，好彩拍攝得好順利。」劇集即將結局，姚子羚指最難忘是跟輝哥分手的場面：「分手嗰幕好難忘，情緒起伏好大，其實我係好鍾意『榮木桐』，奈何佢未婚妻回來，我哋要分手，我仲要講好多反話，不斷祝福佢，將痛苦放喺心。」