孖閨蜜團齊齊睇艷舞 王敏奕性感拍孕婦寫真

王敏奕（Venus）、余香凝（Jennifer）、 麥芷誼（Koyi）、陳靜（Dada）為她們主演的電影《Baby復仇記》合唱電影主題曲外，在拍攝途中亦笑料百出，每次4人一起拍攝也非常開心。其中一場講Dada相約其餘3人到澳門旅行放鬆一下，豈料3位好友卻為她安排了看男士艷舞表演。4人笑言拍攝這場時既尷尬又興奮，Dada說：「我都有過類似所以都好少少，我有一年生日會一班女仔朋友請啲脫夜舞男表演，我拍攝時都有諗返嗰陣情景都冇乜尷尬，反而係Venus、Jennifer、Koyi就好似好尷尬囉！」Jennifer則笑言：「我哋喺化妝間時聽到啲男Dancers到時都好興奮，但點知一Roll機大家就勁尷尬，反差好好笑。」

除了結伴去看艷舞團外，Venus更有孕婦寫真的戲份，戲中長期戴上假肚的她表示：「一開頭覺得好玩，因為好真，但戴咗上身後覺得行路好辛苦，著鞋都要服裝幫手。一到現場化妝就戴，化妝食飯都唔除，到收工真係腰痛膝頭痛，大肚真係好辛苦，會明白孕婦點解燥底。」

Venus大讚導演陸以心善於跟演員溝通，尤其是拍攝這場帶點性感的戲份上，她說：「得意經歷，導演事先有同我講呢場戲，我都覺幾好玩。我工作成日影相，但導演話今次唔想影到好靚，想拍到普通人第一次入Studio嗰種喜劇感，有啲難度，有啲事要錯錯地。事前我冇乜顧慮，導演好照顧演員感受，每一套衫去試都以演員舒服為主。」