【頭條獨家】《冲遊》開拍第六輯　胡慧冲穿梭泰國捐窿捐罅搵料

武漢肺炎疫情持續擴散，全球多個國家都有確診病例，由於泰國係內地人嘅熱門旅遊點，所以當地成為中國以外，疫情最嚴重國家之一。居泰港人「泰國通」胡慧冲（Roger）向本報記者報平安：「曼谷暫時生活如常，學照上，工照返，商場照開，啲人照出街食飯。」Roger慶幸他未有受疫情影響工作量，更預告即將開拍第六輯嘅旅遊節目《冲遊泰國》：「好嘢唔好畀佢停，就算喺疫情下，為咗觀眾眼福都在所不計！」採訪：方騫平

由胡慧冲主持嘅《冲遊泰國》一直成為TVB J2台最強收視節目，所以播足四年，至今拍了97集成為皇牌節目。第六輯暫定今年六月出街，Roger開始着手籌備：「目前曼谷市面上一切如常，大型活動未見取消，工作照去，街道上唔太多人戴口罩，唯一喺捷運入面多咗人戴。口罩、消毒藥物、酒精搓手液都出現搶購潮，不過，呢度好快補到貨。我都有走遍大街小巷，適可而止咁幫屋企人同好朋友掃貨，為咗佢哋，哈！我竟然一個口罩都冇預留畀自己，唯有戴住公仔布口罩頂住先啦，(周圍去搵料唔怕中招？)其實當地人比較樂觀。」

事業未達標唔會死
Roger突然有感而發：「喺自己事業未達標前，應該都死唔去嘅，因為心願未了嘛！」他又大搞爛gag，話自己目標好似歌手咁，總希望登上紅館，感受最大嘅舞台：「不過，呢啲好講機緣嘅，正如我喺《冲遊泰國》插曲《快樂泰度》填嘅歌詞都有勸勉自己：『得不到不必喊，皆因你未到終。』總之一日未死，一日仲有機會。」