【頭條獨家】歐鎧淳「轉性」　胡子彤走出失戀終於識笑

上年年尾，27歲香港女飛魚歐鎧淳被傳媒踢爆背男友胡子彤戀上女籃球運動員倪碧賢，兩人更開設私人ig上載甜蜜生活照，仲有咀嘴相，戀情曝光後，女方火速表示跟胡子彤已分開一段日子。好多人同情失戀嘅胡子彤，不過當事人好堅強，早已走出失戀傷痛，日前約朋友喺銅鑼灣飲啡，同朋友有講有笑，無晒事啦。採訪:梁志明

日前胡子彤出席ViuTV新劇探班時承認同舊愛已經無聯絡，不過佢好大方，知道對方要集訓準備奧運比賽：「希望佢有好成績，祝福佢開心。」胡子彤仲話會留港同家人過農曆新年，之後想去旅行沉澱一吓。

好多笑容
日前下晝4點，胡子彤約咗男友人去銅鑼灣希雲街飲咖啡，失戀男無異樣，偶然除帽撥頭髮，又時不時拎個電話出嚟撳，兩男好好傾，仲傾到不斷大笑，傾傾吓胡子彤發現記者，然後佢開始沉默，周身唔聚財，最後佢忍唔住戴返個口罩，行出嚟搵記者，「想請問你係邊間?同你打個招呼啫。」全程表現友善有禮，人品幾唔錯，單身嘅絲打自己識做啦。