釋出絕密片段幫大家殺菌 Bob啜爆麥玲玲被Cut

林盛斌（Bob）早前與麥玲玲在《流行經典50年》節目合唱《好好戀愛》，搞到網民㷫合合，嗌晒救命留言，「 隔夜飯都爭啲嘔埋出嚟」、「好想打爛部電視」等。
今日，Bob釋出《終極絕密片段曝光》，留言：「等大家喺屋企冇咁悶，順便幫大家殺殺菌！其實現場錄影係仲有呢幕嘅，不過可能導演覺得太震撼，擔心會嚇親d（啲）觀眾同街坊，最後出街嗰段cut咗！」
原來當日唱完Bob摸玲玲姐心口，擺出High爆樣後還有後著，就是Bob背鏡扮狂嘴玲玲姐，玲玲姐由迎接開始已嘟起朱唇，網民繼續笑爆，留言「好彩cut咗」、「有無諗過觀眾感受？」，連何珮瑜都留言：「銀幕情侶」。