太陽眼鏡都跌爛埋　當奴渣馬速度落街搶廁紙

武漢肺炎來襲令全城人心惶惶，本港各區掀起「搶糧、搶罩、搶廁紙」潮，導致市面大部份食品及日用品缺貨，早前森美也於社交網慨嘆超市冇晒廁紙，屋企嗰卷都要慳啲使，而梁嘉琪都叫大家「定啲嚟」，物資夠用就好！日前，商台DJ當奴則於Instagram（Ig）出Po大呻：「早知上次去日本，買多卷廁紙……」估計當時他都撲唔到廁紙，好苦惱！

不過，剛才當奴就於Ig宣布「喜訊」，相中蒙晒面的他拎住10卷一Pack的廁紙，並留言：「用渣馬速度去買廁紙，眼鏡都跌爛埋。#大小都確幸#大把貨 #多謝超市收銀姐姐話每朝都返貨早啲嚟啦 #雷之呼吸」好在當奴平日跑開步，極速「刀手」衝落樓先搶到貨，見他太陽眼鏡都爛埋，相信爭廁紙的場面都好激烈吓！