胞姊黃心美留港湊B　黃心穎赴日幫家人撲口罩

黃心穎去年4月爆出「安心偷食」事件後，隨即避走美國8個月，至1個多月前忽然高調返港，此後不時於社交網Update近況「試水溫」，而近日她又秘密出走，似乎今趟就去了日本滑雪！繼日前於Ig story自爆於藥妝店「Easter Egg Hunt」撲口罩後，今日心穎又於Ig貼出一張由36張相合成的「藥妝店一覽照」，報告當地搶罩情況，她留言：「我相信好多人的旅程都變成這樣。Just want you to know, you are not alone, don't panic.」

有網民即問心穎有冇收穫？她則回覆：「唔會有得掃㗎，佢哋有限制買幾多個，好似4/36間有買到。」即係行到腳跛，都係得大約1成機會買到口罩，仲要有數量限制，真係慘豬！不過，樂觀的心穎說：「有限制都好過畀一個人掃晒嘅。」剛好三家姐黃心慧早前為黃家再添一成員「豆豆」，家中一堆小朋友，有網民都提醒她記得掃埋「童裝口罩」，她卻表示：「小朋友的更難買，日本大部份都係細碼，啱女士同7歲小朋友多啲，BB的只看過一次。」

至於留港的大家姐黃心美則化身「陪月」，在家中幫妹妹湊BB，連日來全港狂搶物資，昨日她都殺落樓，成功買到尿片畀「豆豆」，完上更於Ig story怒吼：「我要飲咖啡嘞，我好需要咖啡，勁需要咖啡！」不過今晨心美又抱住BB笑得勁開心，其間仲忍唔住啜咗對方一啖，所以她都話：「有一種攰叫做幸福攰。」母愛氾濫，不如自己快啲生番個啦！