倡政府仿效黃岡市嚴管外出　林作冒險落街食飯：我真係好怕死！

醫護界發起罷工行動，促港府立即「全面封關」，以堵截武漢肺炎病毒源頭，惟當局至今仍拒回應訴求，令全港市民人心慌慌，繼續瘋搶口罩及消毒產品自保！然而，不少圈中人都直言撲唔到貨，惟有各施各法，有人決定「重用口罩」，有人則以「紙口罩裏面加個布口罩」防疫，結果被網民圍插教壞人。其實冇口罩的話，倒不如學林作修心養性留喺屋企，避免出街感染病毒好過！

在家中「閉關」兩日後，林作今日就「冒險」落中環置地廣場食飯，順道為網民「現場直擊」市面情況，仲留言表示：「街上仍然太多遊手好閒的人！」片中，身處餐廳的他說：「為咗驗證究竟市面上仲幾多唔怕死嘅人喺街，我依家特登身險中環，望吓周圍都仲喺好多『夠薑』嘅人喺度！」鏡頭偷偷一Pan，確實都有些人用餐中，之後，林作續指政府遲遲不落實「封關」，怕且都為時已晚，故建議仿效湖北黃岡市、浙江溫州市，嚴管每戶每兩天只能派一人外出購物資，並謂：「呢啲強硬措施政府唔做，我哋自己做，因為命係我哋自己嘅，我真係好怕死，𠵱家返屋企先！」

雖然減少外出的提議不錯，但搞笑嘅係林作留言稱：「各位，本人現在鄭重呼籲，效仿武漢旁邊個城市（名字不記得），馬上自我實施宵禁……」其實上網Search一Search邊個城市都唔係好難啫，有熱心嘅網民都即刻提佢係黃岡市呀！