【頭條獨家】老公抱女急步行 吳日言追到變晒樣

話咁快曾經嘅冬菇頭吳日言(Yan)已經36歲，結咗婚三年，仲有個女林禧茹（Beatrice）。兩公婆拍拖20年，中間曾經分開然後復合就結婚，家陣阿Yan係一間日式飯糰店嘅老闆娘，成日喺舖坐鎮，好親力親為。日前夜晚六點，吳日言一家三口去咗銅鑼灣希慎拎蛋糕，老公Barry Lam抱住女係咁行，阿Yan就係咁跟住，見吳日言跟到變晒樣，好心阿Barry行慢少少啦。 採訪:梁志明

去年12月初，吳日言有份投資嘅日式飯糰店開幕，佢透露開幕活動因為社會氣氛不穩而一度改期，開業一個月坦言生意麻麻，但佢話會咬緊牙關與香港市民同心度過艱難時期。

下次等埋老婆啦
舖頭唔太忙，吳日言就同老公同個女去銅鑼灣行街，Barry全程抱住個女，阿Yan就一直跟住老公行，佢哋由時代廣場行去希慎，不斷上電梯後到達一間蛋糕店，阿Yan拎單出嚟等攞蛋糕。重點係，由時代廣場開始，兩公婆一個行前一個行後，一家之主抱住個女行得好快，吳日言面有難色跟得幾辛苦，但Barry無乜點等老婆，至去到希慎搭自動電梯時先會望吓老婆，難怪吳日言見到老公笑得咁敷衍。