【型男廚師】《傑少煮意》登場 蔡一傑開YouTube頻道教煮餸

蔡一傑唔只跳舞勁，廚藝亦非常厲害，曾經到泰國學廚兩年。尋日佢就喺YouTube開頻道《傑少煮意》教煮餸，暫時有兩段介紹片同兩段賀年篇教學片，訂閱人數得7百幾人，未算好多，難怪佢要拍片叫人記得subscribe及開心Share。

首段教學片就係教煮白切雞，蔡大廚由去街市買雞開始拍攝，然後洗雞浸雞同劏雞，連切薑蓉都教埋你，非常適合初學者收睇。而第二段片就係教煮傑少炆豬手，想煮團年飯但又唔知點煮？傑少幫到你。