【頭條獨家】Shopping好惆悵　小肥嘟嘴篤面買Mask

小肥（徐智勇）近年好勤力跑步、打拳Keep住副Body，咪睇小肥大大件、個Look好粗獷咁，查實內心應該住咗個「小女孩」！日前4點幾，他獨自現身銅鑼灣買減價面膜，其間表情多多，一時嘟起個嘴仔諗嘢，一時又鼓起泡腮咁，好Cute喎！採訪：梁志明

社會局勢持續不穩，不少商業活動與演出都煞停，藝人收入自然受影響，好在小肥與友人自組的公司業績不錯，他早前表示靠接周年晚宴都維持到。日前，穿綠色外套、孭背囊的小肥，一支公落銅鑼灣撳錢，正所謂「財不可以露眼」，他攞完錢便即刻擰轉身面壁，然後小心翼翼地將啲錢收入銀包，跟住雙手插袋、聽住音樂，好瀟灑咁行去附近萬寧掃日用品。

Dry爆買保濕面膜急救
做藝人當然要好好保養，小肥一入到去擸咗支沖涼梘液，然後再睇Mask！唔知係咪計緊數買兩件抵啲呢？他忽然嘟起個嘴仔又舉晒V，啲手指仲篤落塊面珠度，真係好Cute Cute啵！結果，小肥揀了一盒300幾劈到89蚊的高效特強保濕導入面膜，睇嚟長期單身的他不只Mentally好Dry，Physically都明顯Dry到爆！之後他繼續於店內遊走，其間搵嘢搵到高低眉兼扁晒嘴，好苦惱，唔知係乜嘢咁難搵呢？小肥個表情Keep住好惆悵，真係睇到大家眉頭一再猛皺，最終搞咗20分鐘，都係買得一支梘液同面膜。