【頭條獨家】做跟得夫人陪老公買褲　潘芳芳乸口乸面勁奄尖

現年56歲的資深演員潘芳芳與丈夫陳冠豪（Francis）結婚14年，經常都出雙入對勁甜蜜，早前兩人又黐住落銅鑼灣買衫，潘芳芳全程跟實老公又幫吓對方眼，不過估唔到她對Fashion要求咁高，其間不時拎住衫衫褲褲乸埋口面， Francis就似乎見怪不怪，繼續好滋油慢慢揀，最終兩個都有斬獲離開。採訪：梁志明

潘芳芳於2005年下嫁電台DJ兼導演陳冠豪，翌年更以43歲高齡誕下兒子陳健御，夫婦倆多年來都十分恩愛，出親街都是形影不離！日前傍晚，二人則撇低囝囝，Sweet爆翹住落老銅逛Uniqlo，潘芳芳仲全程傍實老公幫眼揀長褲，殊不知撩撩吓堆西褲，未知是條褲出咗咩大問題？抑或係嫌老公冇Taste呢？她忽然眼耳口鼻乸埋一注「咦～」出聲，表情誇張得離遠都感受到佢勁不屑！於是Francis皺一皺眉頭，然後企埋一邊「放空」，可能潘芳芳見老公唔知想點咁，就開始唔耐煩翹埋雙手，之後索性拖老公去另一邊再揀過。

潘芳芳先擘大對「精明眼」瞄一瞄個價錢牌，200蚊有找真係抵買，她梗係唔執輸即刻執番條卡其色褲Show畀老公睇啦，點知她摸一摸個褲頭，今次又唔知衰邊瓣呢？一張猙獰的臉又重現潘芳芳面上，相反旁邊的Francis就好滋油淡定，結果他都揀到條深藍色長褲，潘芳芳亦都尋到寶，買了一條淺色保暖褲；臨走前，她又睇中一件男裝羽絨背心，隨即拎起擺上老公身拚一拚，Francis試完都笑笑口好滿意，最後兩人掃埋件背心就走人。