【头条独家】做跟得夫人陪老公买裤　潘芳芳乸口乸面劲奄尖

现年56岁的资深演员潘芳芳与丈夫陈冠豪（Francis）结婚14年，经常都出双入对劲甜蜜，早前两人又黐住落铜锣湾买衫，潘芳芳全程跟实老公又帮吓对方眼，不过估唔到她对Fashion要求咁高，其间不时拎住衫衫裤裤乸埋口面， Francis就似乎见怪不怪，继续好滋油慢慢拣，最终两个都有斩获离开。采访：梁志明

潘芳芳于2005年下嫁电台DJ兼导演陈冠豪，翌年更以43岁高龄诞下儿子陈健御，夫妇俩多年来都十分恩爱，出亲街都是形影不离！日前傍晚，二人则撇低囝囝，Sweet爆翘住落老铜逛Uniqlo，潘芳芳仲全程傍实老公帮眼拣长裤，殊不知撩撩吓堆西裤，未知是条裤出咗咩大问题？抑或系嫌老公冇Taste呢？她忽然眼耳口鼻乸埋一注「咦～」出声，表情夸张得离远都感受到佢劲不屑！于是Francis皱一皱眉头，然后企埋一边「放空」，可能潘芳芳见老公唔知想点咁，就开始唔耐烦翘埋双手，之后索性拖老公去另一边再拣过。

潘芳芳先擘大对「精明眼」瞄一瞄个价钱牌，200蚊有找真系抵买，她梗系唔执输即刻执番条卡其色裤Show畀老公睇啦，点知她摸一摸个裤头，今次又唔知衰边瓣呢？一张狰狞的脸又重现潘芳芳面上，相反旁边的Francis就好滋油淡定，结果他都拣到条深蓝色长裤，潘芳芳亦都寻到宝，买了一条浅色保暖裤；临走前，她又睇中一件男装羽绒背心，随即拎起摆上老公身拚一拚，Francis试完都笑笑口好满意，最后两人扫埋件背心就走人。