【頭條獨家】離婚19年 唔諗再嫁畀阿女挑機 葉蘊儀：佢話快過我拍拖
2019-12-29 22:30 
46歲葉蘊儀（Gloria）最近演出ViuTV真人騷，同一樣有過失婚經歷的薛世恆齊齊為《一切從失婚開始》到烏克蘭拍攝，兩人除了四圍參觀，接受不同挑戰，仲大講失婚經驗及感受。離婚19年的Gloria話，諗起當年湊住對仔女都好徬徨，想過重操故業再拍戲，但最終決定發展新事業，為做仔女榜樣更決心讀返書，雖然一直有人追，但她為了仔女着想堅持做單親媽咪冇諗過再嫁，不過仔女現在已長大，20歲細女仲好支持媽咪再覓第二春，更用另類方式挑機當鼓勵同媽咪講：「我諗到我拍拖，你都應該未拍拖啦！？」細女咁講令Gloria哭笑不得，但未有想快啲搵個伴，反而是仔女長大了，她想好好享受自由日子做返自己。撰文：杜淑霞 攝影：李維隆 場地：Hyphen Party & Event
回想2000年，Gloria跟結婚5年的陳柏浩離婚，27歲的她帶住只有4歲的大仔紹臻和1歲的細女紹珩，坦承當時前路茫茫，「第一刻當然好震撼，但係慢慢要游說自己繼續向前行囉！對於我嚟講細路仔係動力嚟。」離婚後，她都有想過重返娛樂圈發展，但最終堅持自己諗法，「我個人比較任性，覺得我想試第二啲人，因為好多人都覺得你應該入返呢行，相對容易啲搵錢呀，或者容易啲適應呀，但對於我嚟講，人生可能過咗四分一咁樣，我係咪應該試下唔同嘅嘢呢！？唔係一定要做返之前嘅嘢㗎嘛！我仲有好多機會去嘗試唔同嘅嘢，到開始做唔同工作之後，我又覺得我要做一個榜樣畀我啲細路仔睇，我以前拍嘢只係讀到中五，想話畀啲細路仔聽，想做就會做到，所以去讀Art揀樣自己鍾意讀嘅嘢，由學士到碩士一路完成佢，畀一個身教啲小朋友，媽咪想做嘅嘢，畀心機都會做到嘅，你哋如果有嘢想做，應該朝住自己目標去做。」
為子女放棄再婚
當年Gloria跟前夫認識未夠一年就閃婚，她覺得相處不久並非導致離婚主因，「我覺得人係會改變嘅，但係有啲人變都係會維持個婚姻，有啲人係唔會變嘅，所以係睇番嗰個人本身，我覺得唔關識得耐唔耐嘅事，係大家珍唔珍惜呢個關係，雙方進行一個磨合。」Gloria坦承一直有人追，但為了一對兒女從來冇想過再婚，「我唔鍾意畀個複雜嘅環境畀小朋友，就算係單親都冇乜問題，畀到一個啱嘅價值，同畀到愛佢哋就得，唔需要專登搵個阿爸或者阿媽畀佢哋，呢一代單親真係好普遍。（唔再婚係咪犧牲？）我唔覺得係犧牲嚟，人生實在太長啦！你同小朋友相處其實好短，佢哋需要你嘅時間好短，所以唔會覺得嘥咗，同佢哋一齊嘅時間重要啲。」
對象唔揀藝術家
現在大仔已23歲，細女都20歲入埋大學讀書，Gloria坦承現在已甩難，可以做返自己，譬如搞藝術工作或者嘗試不同幕前演出，反而冇諗拍拖住，「未準備好接受一段新感情，好享受細路大咗，我甩身做吓自己嘅嘢，有另一半就順其自然。（再拍拖仲諗唔諗結婚？）唔諗咁遠，大家唔好畀壓力大家。」Gloria唔心急拍拖，反而細女替她着急，「又唔係哦嘅，有一個講啫，妹妹講『我諗到我拍拖，你都應該未拍拖啦！』哈哈！佢咁樣比喻，即係話佢會快過我囉！佢應該係想我擴濶生活圈子識多啲男仔。」講到擇偶條件，她反而唔希望對方一樣是藝術家，「佢唔使鍾意藝術，佢接受我做呢樣嘢就得，如果都鍾意藝術好難傾得埋，大家都係會好固執呀，好有自己諗法，咁就仲溝通唔到，我覺得嗰個人應該係欣賞我嘅工作嘅，接受我嘅，畀多啲自由度我。（使唔使過小朋友嗰關？）以前就要，依家唔使，太大啦，以前我主要會諗小朋友先。」
最新回應