【頭條獨家】中環街頭頭岳岳陳奐仁一支公街市買菜

2019-12-18 15:03

嚟自新加坡嘅陳奐仁（Hanjin)初來香港發展時係肥仔一名，憑藉出色的音樂造詣，多年來賣藝不賣樣，歌迷好Buy。不過，17年8月，Hanjin開始進行地獄式減肥，用咗8個月時間，由180磅減到150磅，「改頭換面」成為肌肉猛男，毅力非凡。難得身形Keep足幾年唔容易，日前就見佢喺中環街市鐵皮檔買菜，一買就買咗兩個大椰菜同4個唐生菜，真係食菜都食飽。採訪:張詠森

究竟 Hanjin點解突然減肥，當然同健康有關，佢話之前做身體檢查，發現內臟脂肪過高，會容易導致血壓高及心臟病，為健康著想，就開始健身訓練消脂，訓練內容以Strength Training（力量訓練）及Cardio（帶氧運動）如踩單車為主，鍛練肌肉以達消脂效果。

頭岳岳個樣好搞笑
Hanjin減脂仲唔覺意操埋肌，健康晒又有型咗，完全雙Win。日前下午，見到Hanjin一支公喺中環擺花街便利店買煙，然後行去嘉咸街，中間行過餐廳，食住煙嘅佢望吓放喺門口嘅餐牌，沿途不斷頭岳岳望住宅大廈外觀，其間見到TVB藝人謝東閔，兩人吹咗一陣水，之後再行去鐵皮檔買菜，佢買咗兩個大椰菜，四個唐生菜，買完就將菜放喺背囊，然後再行返去擺花街截的士走。