【頭條獨家】 百人聚集尖咀海旁爆巨響 古仔拔槍型救坐輪椅Bosco
2019-12-16 21:45 
古天樂、張智霖（Chilam）、鄭嘉穎、宣萱和黃宗澤（Bosco）等昨日晨早現身尖沙咀文化中心海旁動用過百人拍攝新片外景，據知劇情講述眾人出席一場國際反恐會議大場面，古仔和嘉穎傍住坐輪椅的Bosco，而宣萱演講期間，突然傳出巨響引起一陣騷動，古仔即相當有型拔槍戒備，而Chilam即時率領人員衝出保護宣萱離場。現場見古仔、Chilam和嘉穎着晒西裝，揸埋槍真係好鬼英，雖然唔知道佢哋拍緊邊套戲，但睇三位男主角人腳，應該是新一輯《風暴》系列電影。採訪：張詠森
據知劇組昨日晨早6時已開始拍攝，除了古仔、Chilam、嘉穎、宣萱和Bosco幾位主角外，仲有陳庭欣、劉浩龍、張松枝、陳安立和夏嫣等參與演出，並租用了文化中心大樓梯位置，出動過百臨時演員拍攝一場國際反恐會議的大場面。
拔槍型到暈
初時見分成兩組拍攝，一邊拍古仔、嘉穎跟坐住輪椅戴住冷帽口罩似患病的Bosco做對手戲，古仔先幫Bosco除下口罩再交談，之後嘉穎再加入，但一聲「巨響」、疑似爆炸聲後，古仔即拔槍戒備，嘉穎則推着Bosco準備離開。另一邊廂，宣萱飾演的演講者進行演講時，Chilam、陳庭欣和劉浩龍一直在旁保護，直到發生「巨響」，Chilam即一手攬着宣萱個頭保護，跟陳庭欣等人離開講台跟古仔等人滙合。雖然Roll機時未有真實的爆破場面，純粹靠導演「聲演」爆炸聲，但也難不到一眾演員，大家都表現得非常專業，尤其古仔演得特別肉緊，加上他揸槍經驗豐富，拔槍一吓真係型到暈！現場所見，早已成為製作人的古仔，不單落力演出，更不時跟工作人員討論鏡頭和拍攝方法，表現得相當投入。拍到兩點多，古仔完成自己戲份，先坐保母車離開。
Nice打招呼
由於拍攝位置於尖沙咀海旁，向來多遊客，自然吸引不少人圍觀，但可能現場太過大陣仗關係，單是主角加臨時演員已超過百人，還有半百的工作人員，反而令有心想八卦者好難搵到明星睇，亦唔會逗留太耐，未至於影響拍攝進度。不過由於拍攝時間好長，Chilam不時同拍檔陳庭欣和劉浩龍等吹水打發時間，見到有傳媒在場，他亦Nice爆向記者揮手打招呼。去到下午3、4點時，他覺得攰攰哋都有扭吓頸做啲伸展動作保持狀態，反而劉浩龍則精神狀態麻麻，不時「放蚊」打呵欠。整日拍攝過程十分順利，約下午4時許劇組便完成拍攝工作收工。
最新回應