【头条独家】告别娘味 单文柔陪拣衫做Stylist 陈展鹏听晒老婆话

时光倒流返去2017年3月，当时陈展鹏同单文柔被传媒影到喺山顶摸黑谈心，被记者撞破后即揸车走人，当年展鹏否认拍拖，话单文柔帮佢做形象设计，只系请食饭答谢，两人扭扭拧拧到7月先至认恋情。然后两人去年10月结婚，今年4月诞下女儿陈诺瑶（小猪比)。讲咁多嘢想带出原来单文柔真系识形象设计，上周二傍晚6点，陈生陈太去咗铜锣湾百德新街Shopping，全程陈太发号施令，试呢件同试嗰件，陈展鹏好乖，听晒老婆话，逐件拼埋镜照，未着上身都Feel到型咗好多，陈太好嘢。采访:梁志明

42岁嘅陈展鹏有女万事足，喺社交平台经常贴7个月大囡囡陈诺瑶（小猪比）嘅得意相，网友狂赞佢亦乐此不疲贴完又贴。有个得意囡囡好满足，有个对形象设计好有心得嘅老婆当然唔好浪费。

陈展鹏系咁换衫
当日下画6点，陈氏夫妇喺百德新街「扫场」，用扫字因为两公婆连环去咗三间潮店，分别系STUDIOUS TOKYO、Shine同D-mop，全程分工好清楚，陈太负责拣，陈生负责试，睇陈太眼光，唔算好特别，都系后生仔潮嘢，有运动型外套、有帽卫衣同拼布外套，衬牛仔裤同布裤都好睇，加对潮波鞋，咪变型男罗。陈太系咁拣，陈生有一段时间长驻更衣室门口，见佢出出入入多次，可能预知要不断试衫，所以只简单穿白Tee方便换衫之馀衬乜都唔会出错。

陈太试到恰眼瞓
陈生搭住老婆膊头，扫完一间再去一间，动作都系重覆又重覆，陈太搵衫再畀陈生试，但可能陈生试到好攰，之后索性拎件衫拼上身照镜就算，两人行咗两个半钟头，陈太战斗力开始减弱，见佢打晒喊露，眼神散乱，感觉佢好想走，之后俾佢发现有锅钉小背囊，见几得意就孭吓，一孭即回魂有返精神，差唔多9点，两人终于收手唔再试，再行过一条街，将战利品放上车就离开。