【頭條獨家】發哥甜言蜜語誘行山江美儀熟女變緊緻索

2019-12-05 23:00

現年48歲，啱啱拎咗TVB長期服務獎十年老人金牌嘅江美儀愈變愈後生，身材仲fit到爆。江美儀一臉滿足多謝周潤發：「全靠佢用甜言蜜語嚟鼓勵我行山，發哥叫我keep好啲，第時同佢合作，做戲中女主角呀。」有張咁大期票，發哥成功向美儀「放毒」，𠵱家行山漸漸成為美儀嘅嗜好。採訪：方騫平

江美儀一直提不起興趣行山，直至受朋輩影響，見方平、鮑姐(鮑起靜)等跑完後身體好咗好多才嘗試。經用心苦練，進步神速，才掹車邊進階發哥領軍的高級組：「發哥成日鼓勵我跑多啲，放鬆啲！咁樣會令身體健康啲！佢好好，好識氹人開心，同我打氣，佢同我講：『以前合作嘅女星個個結晒婚生晒仔，唔做呢行喇，咁我出嚟拍戲都要搵女主角㗎，咁你就啱我喇，但如果你唔Keep，咁我一路後生落去，相反，你就會變老，咁第時你就要做我阿媽㗎喎，所以你都要keep住做運動呀！』」因為發哥把口實在太勁，江美儀的起心肝去行山。

同前夫有聯絡

對於行山感覺，江美儀狂讚，「自從行咗山之後的確冇晒水腫，個人結實同精神咗好多，𠵱家好似上咗癮咁，每周好期待呢日來臨，每次跑完山發哥都會請埋我哋班隊員去食飯，有時佢仲會帶埋私人教練嚟指導大家，發哥為我哋健康著想，出錢出力，又可聯誼，咁都唔做就太蠢喇！」不經不覺江美儀喺電視行業22年，前朝喺亞視屬起步階段，直至近10年過檔TVB打拼，今年正式轉咗一年一show新合約，主力向外搵真銀。回想當年向亞視祼辭並無後路，好谷底，幸得當時姑奶吳君如幫手穿針引線過檔無綫，跟住得到黃金10年。問她可感唏噓？美儀話冇，仲話同吳君如及前夫吳君祥都有Keep住聯絡。