【頭條獨家】恐怖腦膜炎生死搏鬥168小時 韓馬利死過翻生要享受人生

人生無常，對險死的韓馬利（Mary姐）來說有深切體會。今年八月，65歲的Mary姐因腦膜炎在醫院昏迷了一周，原來當時相當危險，一隻腳踩咗入鬼門關，連醫生都話：『好少咁大年紀仲患腦膜炎，會比較棘手。』對症下重藥三星期，冇咗炎症，但接下來還要面對腦部受損後引發嘅種種後遺症，包括有輕微抑鬱症、氣虛血弱同埋腦筋遲緩等狀況。執返身彩的Mary姐坦言唔怕死更有感而發：「唔知餘下日子仲有幾多，要過有質素、有意義嘅生活，要豐盛人生。以前冇做過嘅事，亦要補償返畀老公，至少要多啲去欣賞佢。」採訪：方騫平 場地：IDance

呢場生死搏鬥喺今年八月發生，面黃黃的Mary姐憶述時猶有餘悸：「好記得嗰日凌晨出發，抱病同老公杜燕歌去內蒙古做嘢，當時個身滾滾地燒得唔算嚴重，以為只係普通感冒啫，啪粒成藥就冇事，點知兩日後返港仲未退燒，好彩我順老公意去睇醫生，醫生建議我馬上入院，當時我仲未知死，懷疑醫生錯判，最後印象坐上輪椅搞入院登記，之後發生乜事就唔太清楚，因為經已陷入昏迷狀態，斷晒片！」

昏迷七日嚇死老公
Mary姐昏迷一星期後稍為有返意識，「原來喺頭7日未斷到症嘅日子，我嘅病情相當危急，嚴重到神智不清，要抽骨髓嚟化驗，但咁痛我都冇知覺。老公當然好驚，不知所措係咁喊，話寧可我好似以前咁成日駁佢咀！探過我嘅朋友話，當時我講嘢語無倫次相當恐怖，問埋啲奇怪嘢，嚷著話執行李走，要趕去拍劇集《唐人街》(其實套戲已拍完)，又反問護士點解唔畀我走？我只係嚟探病喎！甚至一日偷走過兩次，又試過突然走入廁所，除晒啲衫話要沖涼，嚇到護士飛奔入去幫手。醫生見我神智好唔妥，決定安排我照磁力共振照吓個腦，最後確診係腦膜炎，估計因為我有幾日去唔到廁所，細菌排唔出體內上咗腦，所以𠵱家我好重視便秘問題。」

食唔落患輕微抑鬱
Mary姐吊咗三個多星期抗生素，雖然一日比一日清醒，但開始發覺腦部轉數變慢，唔識撳電話回覆朋友訊息，個人又暈陀陀，好攰好攰，起身15分鐘就要瞓返落牀，真係執金都冇力，原來要面對好多後遺症開始識驚：「我幾日幾夜食唔落嘢，吞極都吞唔到，每次食嘢好想喊，老公好擔心我要插胃喉灌食，猛勸我食小小粥水，因為又瞓唔到，個人好虛脫，好負面，好恐慌，而且手震、腳震，要老公拖住行，甚至瞓到半夜全身出汗，但係咁打冷震。醫生講明唔可以再病，一病就救唔到我，老公怕我冷親，成晚幫我全身攝乾毛巾吸汗。後來經教友介紹再睇心理醫生，評估我因為腦膜受損影響有輕微抑鬱症，要食六個月血清素控制，加埋高劑量維他命C及補腦補充劑，現時食得瞓得，由最瘦得返46KG回升到50KG，雖然記性仲係差小小，尤其係唔記得人名，但我當自己好返晒。哈！我諗我暫時拍唔到古裝劇，做唔到專業律師、醫生、法官。腦科醫生話最快要等半年畀個腦康復，叫我惟有打多啲麻將。」

懺悔要做個好老婆
Mary姐因為病而拉近了兩公婆的關係：「今次變相係祝福，發覺原來老公好細心，結婚三十年從來未見過佢對我咁緊張，服侍周到，朋友提供健康餐單，佢就照辦煮碗整畀我食，如人蔘燉湯，後來睇中醫先知嗰個階段虛不受補，所以食到我…哈哈…老公仲禱告話寧願啲病畀晒佢，因為老婆唔識得照顧自己喎，好感動，以前佢有乜嘢都唔表達出嚟，我係男人性格，佢唔講我鬼知咩。回想返老公試過發高燒入院，我坐咗陣就話趕住去開工，佢怪我冇煲過嘢探病，三日後仲要自己出院，但我以為佢小題大做喺度玩嘢；我又冇陪佢做激光打腎石手術，當時我開工開得密嘛，見佢冇事咪返工囉！呢啲老婆咪衰囉，邊度會衰成咁，𠵱家傾返我有同佢say sorry㗎，以後我都唔會成日投訴佢，盡量唔會駁佢咀。」