【黎小田病逝】難忘前輩愛笑 洪卓立：一路好走

黎小田在主持《流行經典50年》節目時跟很多後輩合作，洪卓立是其中之一。洪卓立說：「佢無架子，好nice，好鍾意笑，雖然《50年》係第一次合作，但綵排時就算我唱錯咗佢都會好主動同好有耐性去教導我，一路好走。」

鍾舒漫：「小田哥係一位令人好敬重嘅前輩，佢嘅音樂造詣對樂壇貢獻好大，有好多膾炙人口嘅作品，佢嘅離開好可惜。」

羅力威：「小田哥好nice、無架子，好照顧、好肯教導後輩，希望佢一路好走。」

許靖韻：「小田哥係一個非常好嘅前輩，非常提携後輩嘅前輩，我之前喺《流行經典50年》合作過幾次，佢幫我彈琴，亦對我非常好。佢亦都係一個好緊貼潮流嘅前輩，佢同我講：我都有睇『小背心』啲片㗎。同佢合作我覺得好窩心。亦都覺得好可惜，但佢好嘅作品係會繼續流傳落去嘅。」

曾樂彤：「收到呢個消息好難過，之前大家都有合作過，喺《流行經典50年》入面，佢對我哋啲新人都好好、好照顧我哋、教我哋好多嘢，好遺憾樂壇失去咗一個好好嘅前輩，希望佢嘅家人同朋友保重。」