【頭條獨家】單拖買平價襪同Boxer 志雄哥20℃行街成身汗

2019-11-28 17:05

因為演「大佬B」一角演到深入民心嘅志雄哥喺內地好有Market，雖然《古惑仔》已變出土文物，但仍不斷有人搵志雄哥去內地做商演同登台，一星期最少三、四日都會帶埋老婆去大陸開工，最近佢先後喺河南同四川開咗間火鍋店，又開咗志雄廚房，更親自飛去主持開幕禮。好忙嘅佢日前去咗銅鑼灣買襪同Boxer，舖頭有冷氣，街外亦非常清涼，但志雄哥仍然不斷流汗，係咁用毛巾抹抹抹。採訪:梁志明

志雄哥今年60有5，中氣十足非常壯健，久唔久都會拍吓戲，仲喺內地開咗超過6間餐廳，佢話唔係想搞咩飲食王國，純粹開嚟招呼朋友，生意仔啫。另外，志雄哥近年鍾意玩吓微博，上載吓生活逸事，連微博名都由「大佬B吳志雄」改為「大佬B吳志雄開心快樂人」，睇得出志雄哥近年活得幾開心。

毛巾掛頸隨時抹
當日4點，孭住個名牌背囊嘅志雄哥喺皇室堡GU買日用品，包括襪同Boxer，前者一pack三對59蚊，後者79蚊三條，志雄哥快揀快畀錢，店舖冷氣夠但志雄哥仍然將毛巾掛喺頸以便隨時可用，買完離開，志雄哥行咗幾步路已經出晒汗，見佢抺身又抹面，唔知以為炎夏。行咗一陣佢停低除帽撳電話，然後再行去百德新街飲下午茶。