【头条独家】单拖买平价袜同Boxer 志雄哥20℃行街成身汗

2019-11-28 17:05

因为演「大佬B」一角演到深入民心嘅志雄哥喺内地好有Market，虽然《古惑仔》已变出土文物，但仍不断有人搵志雄哥去内地做商演同登台，一星期最少三、四日都会带埋老婆去大陆开工，最近佢先后喺河南同四川开咗间火锅店，又开咗志雄厨房，更亲自飞去主持开幕礼。好忙嘅佢日前去咗铜锣湾买袜同Boxer，铺头有冷气，街外亦非常清凉，但志雄哥仍然不断流汗，系咁用毛巾抹抹抹。采访:梁志明

志雄哥今年60有5，中气十足非常壮健，久唔久都会拍吓戏，仲喺内地开咗超过6间餐厅，佢话唔系想搞咩饮食王国，纯粹开嚟招呼朋友，生意仔啫。另外，志雄哥近年锺意玩吓微博，上载吓生活逸事，连微博名都由「大佬B吴志雄」改为「大佬B吴志雄开心快乐人」，睇得出志雄哥近年活得几开心。

毛巾挂颈随时抹
当日4点，孭住个名牌背囊嘅志雄哥喺皇室堡GU买日用品，包括袜同Boxer，前者一pack三对59蚊，后者79蚊三条，志雄哥快拣快畀钱，店铺冷气够但志雄哥仍然将毛巾挂喺颈以便随时可用，买完离开，志雄哥行咗几步路已经出晒汗，见佢抺身又抹面，唔知以为炎夏。行咗一阵佢停低除帽揿电话，然后再行去百德新街饮下午茶。