為周日旺角開騷倒數 鄧小巧恐慌興奮攪肚痛

鄧小巧將於周日在旺角麥花臣場館舉行首次個人演唱會，踏入開騷倒數階段，小巧形容心情複雜，恐慌、興奮、期待和繁忙，甚至乎有少少「攪肚痛」囉囉攣的感覺！
這次音樂企劃，小巧與團隊足足花了一年時間，由創作到錄歌，製作到宣傳，出唱片到開騷，一步一步走過來。她說：「雖然今次演唱會場地唔係好大，但我哋都會全力去做，一定要觀眾感覺到由音樂、畫面到舞台效果都準備就緒，保持順利和最佳狀態。籌備期間遇到好多波折，台前幕後經常處於擔憂狀態。所以走到依家，希望一切順利，大家平安。」愛笑又愛哭的小巧自嘲：「希望我到時喺台上唔好喊咁多！」

為了保持最佳狀態，小巧最近戒吃肉，還戒了夜瞓。她說：「演唱會rundown非常嚇人，唔單止練歌好多，仲要消耗好多能量，所以最近非常注意飲食，戒紅肉食清啲，減輕身體負擔，會食魚和雞蛋，吸收良好蛋白質，身體和皮膚都好咗好多！我仲為咗今次演唱會戒咗夜瞓，每日都好定時綵排和飲食，加上到時台上冇『提詞機』，所以每晚瞓覺前背完歌詞就上床瞓覺，希望完騷後都能保持早睡早起好習慣。」