【頭條獨家】面皮薄唔敢高調宣傳 陳樂榣轉型設首飾品牌
2019-11-28 20:00 
前女子組合Freeze成員陳樂榣（Alley），2010年組合解散後，曾修讀美術的她轉行開畫室教畫畫，13年開始受好友楊柳青啟發搞網上首飾生意，婚後生埋女的她跟搞開時裝生意的老公成立自家首飾品牌，除了做網店，在銅鑼灣亦有實體店，她坦言因面皮薄不敢高調宣傳，依家算有點成績先敢認自己做老闆。採訪：杜淑霞
畢業於加拿大中學Granville College美術系的Alley，受畫家外公影響，6歲就畫畫，所以組合解散後她不愁沒出路，即在上環開設畫室教畫畫，「嗰時都幾多學生，但年幾兩年後好多學生畢業，生意冇咁好我就開始諗出路。」
兩公婆拍住上
當時Alley受好姐妹楊柳青影響，開始搞網店，「佢嗰時賣開韓國衫，我自己一向都好鍾意韓國啲首飾，又有學韓文，咪跟埋佢一齊去韓國入貨，最初我都碰過我好多釘㗎！入嘅貨品質素有時好參疵，啲客成日換貨都又唔係辧法，所以我學埋首飾設計，就算唔識整都明白個原理，唔會畀客人同廠家考起。」
12年Alley跟從事時裝生意的老公Donald結婚，兩公婆拍住上正式成立自家品牌「WOW Fashion Jewellery」，除了網上賣，在銅鑼灣都有實體店，更自設首飾廠，由設計、生產和零售都一腳踢。Alley直言生意開始上軌道才敢宣傳，「我面皮薄，所以唔適合做藝人，以前怕畀人話未做得好就高調宣傳，依家算有啲成績先敢認自己做老闆。」
最新回應