【專欄】曾鈺成開工啦！

正是「輸就要認，打就企定」。前日《星島日報》頭條《區議會變天》！有冇乜出人意表？對小弟這類傳媒老手，長期分析本土政情者來說，丁點也不意外，絕對意料之內！

所以，當見到落敗的雙料建制議員麥美娟滿肚冤屈咁款呻：「如今選民投票，並非投實質地區工作成績，只是針對政府施政失誤，引起極大民憤而作『立場性投票』！」（大意）

嘩嘩嘩，呢個論調，是否「阿媽係女人」？做得建制派議員，長期受政府寵幸兼政策傾斜幫到盡，當然要榮辱與共，點可以話着數攞盡，有鑊唔孭，咁冇義氣呢？

正是勝不驕，敗不餒。今次建制派表面大敗，但睇番真正得票，明顯鐵票仍在。只要政治氣候轉變，政府施政有為（得唔得呢吓？），加上繼續努力做地區工作，失去的票，總有機會贏番的，這方面，小弟認為民建聯創黨主席曾鈺成，最有視野及智慧。

資深選民必記得二○○三年，建制派因要頂住前特首董建華推《廿三條》立法，結果有如今次一樣，失盡民心，區議會選舉輸到趴低。老曾二話不說，先公開辭去黨主席一職（今次佢徒弟李慧琼就真係尷尷尬尬咯），為選舉失敗問責，然後，再為全個黨下次選舉重新部署。

結果，之後在政府扶一把（暗力？）之下，很快民記及眾建制派，再次奪回不少區議會及立法會議席，成為第一大黨，直至如今！

好嘞，一場「修例風波」，又將被逼攬住政府的一眾政黨打沉，全部輸到瞓低。係，好冇癮！但建制派是否等於從此瓜得？當然唔係。問題在佢哋有冇曾鈺成呢類具江湖地位，高IQ、EQ及AQ的超班馬（唔好同我辯論忠奸正邪！），去重新組合成個陣營。若果再是你唔服我、我唔服你（民建聯、新民黨、自由黨、工聯會及經民聯皆有不少大哥大姐口心皆不和），咁內鬥之下，必前景堪虞，下年立法會選舉繼續輸。

睇來睇去，曾鈺成是否要出山開工呢？（曾智華）

全文刊於《星島日報》「阿碌開咪」專欄